alternativo de PHP

[Edmund GRIMLEY EVANS <edmundo@rano.org>]

Antaŭ nelonge mi eklernis pri PHP kaj uzis ĝin por kelkaj etaj
projektoj, ekzemple por TTT-aliro al vortaro: http://rano.org/neavo/

Tamen, la lingvo agacegas min. Ĉiu funkcio estas malbone difinita, kaj
ofte ĝia konduto varias inter diversaj versioj de PHP. Jen nur la
lasta ekzemplo: kiam oni ricevas la valorojn de formularo per
variabloj, kelkfoje ' estas konvertita al \', kelkfoje ne, depende de
la versio. Kiel oni kreu sekuran kaj fidindan programon kun tia
konfuzo?

Fonto de tiu konfuzo, kiu ekzistas grandkvante ankaŭ en Perlo, estas
misa deziro helpi al la uzanto per aŭtomataj konvertoj, ktp, anstataŭ
per simpla eraro. Cerbumu pri jeno, se vi emas:

printf "0" | perl -le 'while (<>) { print; }'
printf "0" | perl -le 'while (<>) { print if $_; }'

Mi preferas lingvon, kiu devigas min tajpi iom pli da signoj, sed
rekompence donas al mi ŝancon kompreni, kio okazas.

Do, ĉu ekzistas alternativo de PHP, kiun mi povas simile apliki en
TTT-paĝoj?

Edmundo